Və Hər Kəs Öldürür Öz Sevdİyİnİ

Və hər kəs öldürür öz sevdiyini,
Qoy hamı dinləsin məni diqqətlə,
Kimi acı baxışla başlayar bunu,
Kimi yalan-yaltaq sözləri ilə.
Qorxaqlar öpüşlə məhv edər onu,
Cəsurlarsa qılınc zərbələriylə.

Kimi gənckən öldürür sevdiklərini,
Yaşlı vaxtlarında öldürən də var.
Kimi qurban verər öz şəhvətinə,
Kimi qır-qızılla onu soldurar.
İnsaflısı bıçaq alar əlinə!
Kəsdiyi tez ölər, tez də soyuyar.

Kimi çox az sevər, kimisi lap çox,
Kimi satar onu, alar başqası.
Kimi gözyaşına boğulub edir,
Kimi uf da deməz, saxlamaz yası.
Sevdiyini çünki hər kəs öldürür,
Amma hər öldürən çəkməz cəzasın!

Xəyallar bİr at olsaydı

Xəyallar bir at olsaydı,
At tək nəcib, güclü, yüyrək,
Səyirdərdim sağa, sola,
Bir-bir tərkinə minərək.

Xəyallar bir at olsaydı,
Vəhşi bir at, dəli bir at,
Çapıb ötüm qorxuları,
Arxada qalsın qaramat.

Xəyallar bir at olsaydı,
Xəyallarımsa at deyil.
Nədir, özüm də bilmirəm,
Sərgərdan, nizamsız, veyil.

ƏZİZ SƏNƏ

Mənə hər bir şeydən əziz sənə mən,
Şeir həsr etməyə qorxuram, birdən,
Oxuyub, məndən gənc, layiqli biri,
Səni mən tək sevər, mən kimi qəlbdən.


Mənə hər bir şeydən doğma səni mən,
Vəsf etməyə qorxdum, sevən kəs birdən,
Öz sevdiciyinə eşqin bildirər,
Səninçün tapdığım gözəl sözlərdən.

Qalay Əsgərcİk

Qalay əsgər

Əynində mundiri
 Özü qalaydan.
Dayan! - deyir əsgər, 
 Yol yoxdur burdan!
 Səsləndilər ona:
 Kraliçayam mən, 
 Təcili kralla
 Görüşməliyəm!
 Əsgər cavab verdi:
 Təəssüf edirəm. 
 Krala belə yol
 Verə bilmərəm.
 Görsəm kralı da,
 Deyəcəm belə:
 Giriş-çıxış üçün,
 Şifrəni söylə.
 Şifrəni bilirəm! 
 Səs gəldi yenə.
 Şokolad sözüdür, 
 Dedilər mənə.
 Yolüstü bir az da 
 Aldım sizinçün.
 O! - dedi əsgərcik, 
 Buyurun, keçin.
 Əynində mundiri,
 Özü qalaydan
 Belə şirnisevən
 Taparsız hardan?!

Salam daşıyan gəmİ

Əbədi saxlamaz səni bu lövbər,

Sən ki, yaranmadın dayanmaq üçün.

Fırtına təhdiddir, incidə bilər,

Durğunluq öldürər səni büsbütün.

*    *    *

Hazırlaş, özünü bərkit yollara,

Üzməyə et davam, qanad aç uç sən! 

Bir də, salam söylə bütün dostlara,

Əgər sən onları sahildə görsən.